短宣分享

其實今年已經係我第二次參加短宣。記得第一日去到營會嘅時候，有位小朋友問我：「點解又係你㗎？」我當時唔係好識得答佢，但係呢個問題，令我即刻想返起當時那些小朋友嘅笑容，想起當年我哋同佢哋一齊玩遊戲嘅歡樂時刻。我又記得小朋友對我們的愛－每餐弄冰淇淋給我們吃。神叫我想返起當初短宣所有美好嘅回憶。其實，我係特別鍾意啲曳嘅男仔，上年其中一位小朋友，成日見到佢揸住個Rubik’s cube，成日會無端端抌舊嘢落地下，同埋情不自禁咁講嘢。當初我哋以為佢好百厭，但係時間耐左之後，就發現到佢嘅恩賜。佢上年表演戲劇扮個浪子回頭扮得非常精彩，非常之搞笑，令到我哋所有嘅義工都笑到肚痛。

其實神創造人真係好特別，我見到每一個小朋友都有唔同嘅性格，所以我哋用唔同嘅方法去接觸佢哋。非常之感恩，我有班好好嘅弟兄姊妹，佢哋用神所賜佢哋嘅恩賜，去接觸唔同嘅小朋友。其中有三位姊妹用佢哋藝術嘅天份同班小朋友一齊跳舞，玩得非常之開心。我又見到一位同啲細路仔差唔多大嘅弟兄，做佢哋嘅大哥哥，帶領呢班小朋友去玩遊戲。睇見呢班弟兄姊妹嘅突破同埋成長令我非常之觸動。我比佢哋事奉嘅熱情感染到，喺我心燃起一團火。鼓勵我繼續去接觸呢啲小朋友。

最後，響一次小組分享裡面，梁牧師提醒我哋，其實啲小朋友唔會記得我哋教啲乜嘢，但係會記得我哋同佢哋一齊玩嘅經驗。所以，我哋唔需要太過介意結果，但係要享受同小朋友一齊玩嘅過程。當我諗返起，覺得梁牧師講得好好，因為我上年都唔記得咗我教啲小朋友乜嘢，但係我記得同佢哋玩嘅生活點滴，以生命影響生命。我希望呢次個夏令會啲小朋友會感受到我哋對佢哋服侍嘅熱情，並且逐漸認識上帝。如果下年有機會我都想同錫安呢班弟兄姊妹一齊再去短宣，一齊創造美好的回憶。

– Enoch Cheng

返回